ആകാശവും തൂവലും

ഒരേതൂവല്‍പറവകള്‍

ഒരുമിച്ചു പറക്കുന്നു എന്നല്ല

ഒരുമിച്ചു പറക്കുന്ന

ചിറകുകള്‍ക്ക്

ഒരേ തൂവലുകള്‍ എന്ന്

ആകാശത്തിലെ പറവകള്‍

വിതയ്ക്കുന്നില്ല എന്നല്ല

വിതയ്ക്കാന്‍ വെച്ച

വിത്തുകളെന്ന്

മഴയത്തു പറക്കുന്ന പറവകള്‍

വെയിലത്തും പറക്കുന്നില്ല

എന്നല്ല

മഴപെയ്തു് പറക്കുന്നു എന്ന്

കൂടൊഴിയുന്ന പറവകള്‍

കൂട്ടിലേക്ക് മടങ്ങുന്നില്ല

എന്നല്ല

കൂടുമായി പറക്കുന്നു എന്ന്

ആകാശത്തിലെ പറവകള്‍

ആകാശത്തിന്റെ പറവകള്‍

എന്നല്ല

ആകാശത്തിന്റെ തൂവലുകള്‍ എന്ന്