"ആണവോര്‍ജ്ജപദ്ധതികള്‍ ഉപേക്ഷിക്കുക,

ഇന്ത്യ-അമേരിക്ക ആണവക്കരാര്‍ റദ്ദു ചെയ്യുക"

യുവകലാസാഹിതിയുടെ

ആഭിമുഖ്യത്തില്‍

ആണവവിരുദ്ധസമ്മേളനം

2011 ആഗസ്ത് 6 ശനി(ഹിരോഷിമ ദിനം)

വൈകുന്നേരം 3മണി

നീലേശ്വരം ബസ് സ്റ്റാന്റ് പരിസരം

പ്രിയരെ,

മനുഷ്യനും ജീവരാശിക്കും അപായമുണ്ടാക്കാത്ത ഊര്‍ജ്ജോത്പാദനത്തിലേക്ക് ശ്രദ്ധയൂന്നണം എന്നാണ് ജപ്പാനിലെ ഫുക്കുഷിമ ആണവദുരന്തം വിളിച്ചു പറയുന്നത്. എന്നാല്‍ ജനസുരക്ഷയും ജനനന്മയും ലക്ഷ്യം വെച്ചു കൊണ്ടുള്ള പദ്ധതികള്‍ക്ക് മുന്‍ഗണന നല്‍കാതെ സാമ്രാജ്യത്വത്തിന്റെ പണക്കൊതിക്ക് അടിമപ്പണി ചെയ്യുകയാണ് ഇന്ത്യന്‍ ഭരണാധികാരികള്‍.

ഇത്തരം പദ്ധതികള്‍ക്കെതിരെയുള്ള ചെറുത്തുനില്പുളോട് ഐക്യദാര്‍ഢ്യം പ്രഖ്യാപിക്കുകയാണ് യുവകലാസാഹിതി.

സംഹാരാത്മക ആണവപദ്ധതികള്‍ക്കും, ഇന്ത്യന്‍ ഭരണാധികാരികള്‍ അമേരിക്കയുമായി ഒപ്പുവെച്ച ആണവക്കരാറിനുമെതിരെ, യുവകലാസാഹിതി സംസ്ഥാനവ്യാപകമായി ഒരു മാസം നീണ്ടു നില്‍ക്കുന്ന പ്രചരണപരിപാടികള്‍ നടത്തുകയാണ്.അതിന്റെ ഭാഗമായി നീലേശ്വരത്ത് ആണവവിരുദ്ധസമ്മേളനം നടത്തുന്നു.പ്രമുഖര്‍ പങ്കെടുക്കുന്ന സമ്മേളനത്തില്‍ പങ്കടുത്തും ഈ പ്രചരണങ്ങളോടൊപ്പം നിന്നും സഹകരിക്കുമല്ലോ.

അഭിവാദനങ്ങളോടെ

വല്‍സന്‍ പിലിക്കോട്, ജയന്‍ നീലേശ്വരം,

പ്രസിഡന്റ് സെക്രട്ടറി

യുവകലാസാഹിതി

കാസര്‍കോട് ജില്ലാ കമ്മറ്റി

കാര്യപരിപാടി

സ്വാഗതം:സെക്രട്ടറി

അധ്യക്ഷന്‍:പ്രസിഡന്റ്

ഉദ്ഘാടനം:കെ.രാമചന്ദ്രന്‍

ലഘുലേഖ പ്രകാശനം:രാധാകൃഷ്ണന്‍ പെരുമ്പള

പ്രസംഗം:എന്‍.സുബ്രഹ്മണ്യന്‍

നന്ദി:രാജീവന്‍ കാഞ്ഞങ്ങാട്

കാടോടികള്‍

"അമ്മാ... ധര്‍മ്മം തരണേ..."

ഒച്ച കേട്ട് ഞാന്‍ സുഖനിദ്രയില്‍ നിന്നും ഉണര്‍ന്നു.

ഞാന്‍ എണീറ്റ് വാതില്‍ തുറന്ന് മുറ്റത്തേക്ക് നോക്കി.ആരെയും കാണുന്നില്ല.അപ്പോള്‍ കളത്തിനു പുറത്ത് വീണ്ടും ഒച്ച.എനിക്കു വിശ്വസിക്കാനായില്ല.രണ്ടു മയിലുകള്‍. ഒരാണ്‍മയിലും ഒരു പെണ്‍മയിലും.

എനിക്ക് നോക്കി നില്‍ക്കാനേ കഴിഞ്ഞുള്ളൂ.

ഏറെ നേരം അവ കാത്തു നിന്നു.ശേഷം അവ രണ്ടും തിരിച്ചുനടന്നു.

വരള്‍ച്ചയെന്നും വെള്ളപ്പൊക്കമെന്നും പറഞ്ഞ് ധര്‍മ്മത്തിന് വരാറുണ്ട് . നാടോടികള്‍. എവിടെ നിന്നും അവര്‍ക്ക് ധര്‍മ്മം കിട്ടാറില്ല.

കാടോടികള്‍ക്കും അതേ ഗതി.

ഒഴിഞ്ഞ ജീവിതം

ഒഴിഞ്ഞഗ്ലാസ്

ഒഴിച്ച് വെച്ച്

കരുണാരേട്ടന്‍ പോയി

പുല്ലിനും

പുല്‍ച്ചാടിക്കും

കാക്കയ്ക്കും

പൂച്ചയ്ക്കും

പച്ചയായ ജീവിതം

ഒഴിച്ച് പകര്‍ന്ന്

ഒഴിഞ്ഞകീശ

യാനപാത്രമാക്കി

അക്കരെ പറ്റി

കരുണാരേട്ടന്‍

നേര്‍ക്കുനേര്‍

പോരടിച്ചു നിന്ന

ജീവിതത്തെ

അവസാനത്തെ

ഒറ്റശ്വാസം കൊണ്ട്

മലര്‍ത്തിയടിച്ചു കളഞ്ഞു

കരുണാരേട്ടന്‍

മരിച്ചുവീണ

വാടകവീട്ടിന്റെ തിണ്ണ

കലഹിച്ചു നിന്ന

പ്രത്യയശാസ്ത്രങ്ങള്‍ക്ക്

മറുത്തു നില്‍ക്കാനാവാത്ത

ഉത്തരമായി

ചുണ്ടുകളിലേക്ക് പകര്‍ന്ന

സന്ദേഹങ്ങളുടെ തീ

ഒടുവില്‍

ചിത മാത്രം

ഏറ്റെടുത്തു.

ശവപ്പെട്ടി

കാലത്തിന്റെ

കൂട്ടില്‍ക്കിടന്ന്

ഇടയ്ക്കിടെ

അലറുന്നുണ്ടവന്‍

ചില്ലലമാരയില്‍

സൂക്ഷിക്കാന്‍

ക്യാമറ

വേണ്ടും വിധം

ഒപ്പിയെടുക്കുന്നുമുണ്ട്

ആകാശത്തിന്റെ

ഓര്‍മ്മകള്‍

കൂട്ടിലാക്കിയ

കാടിന്റെ മേഘങ്ങള്‍

ഫ്രെയിമിനകത്ത്

വിങ്ങി നിന്നു

അഴിമുഖത്തിന്റെ

ചില്ലിട്ട ചിത്രം

ആഴിയെ

സങ്കടം കൊണ്ട്

വറ്റിച്ചു കളഞ്ഞു

പ്ലാച്ചിമടയിലെ തവളകള്‍

കുപ്പായമിട്ട കുയ്യാനകള്‍

പിന്നാക്കം കുയ്ച്ച് കുയ്ച്ച്

പ്ലാച്ചിമട

ശ്വസനത്തിനും

സ്വാതന്ത്രമുള്ള കിണറ്റില്‍

കുയ്യാനകള്‍ക്കു്

തവളയുടെ കുപ്പായവും

അവയ്ക്ക്

ചൊറിയും ചുണങ്ങും

തൊലിപ്പുറത്തെ

കാലാവസ്ഥ

നോക്കി നോക്കിയിരിക്കെ

നാടിന് കിണറിന്റെയും

കിണറിന്

കുപ്പിയുടെയും

ആകൃതി സംഭവിക്കുന്നതു്

കാഴ്ചയുടെ രോഗം കൊണ്ട്

വാലു കാണാതായി

പ്രായം പൂര്‍ത്തിയാവുന്ന

മാക്രികള്‍ക്കും

കിണറ്റില്‍

വണ്ണം വെക്കല്‍

പൊക്കം വെക്കല്‍

ഇങ്ങനെ രണ്ടുപക്ഷങ്ങളില്‍

വികസനം

ഒള്ളയുടെ തൊള്ളയിലും

ഇവയ്ക്ക് തൊണ്ടയില്‍

രാമശങ്കരമന്ത്രം

അടുത്തജന്മത്തിലും

കുപ്പിയുടെ വയറ്റില്‍ത്തന്നെ

വേണേന്ന്

വികല്പം

മുന്നറിവില്ലാത്ത വികല്പചോദ്യത്തിനുത്തരം

എത്തിപ്പിടിക്കുന്നേരം

ഉതിരുന്ന കിനാവ്

തെറ്റിനും ശരിക്കുമിടയില്‍

തിരിച്ചെഴുതാനാവാതെ

തിരിച്ചൊഴുകാനാവാതെ

വഴിയറ്റ് വറ്റിപ്പോയ

എഴുതിപ്പോയതുത്തരം

എന്ന് പരതിയെഴുതാന്‍

ഒറ്റജന്മത്തിന്റെ

സങ്കടം

നിഴല്‍

പുഴ നീയൊഴുകുമ്പോള്‍

പുഴ നീയൊളിയുന്നു

എന്‍ നിഴലൊളിയുന്നു

ഞാന്‍ കുളിരറിയുന്നു

പുഴ നീയൊഴുകുമ്പോള്‍

ഇന്നലെയൊളിയുന്നു

ഇന്നലെയലിയുന്നു

ഇന്നലെയൊഴുകുന്നു

ഇന്നായൊഴുകുന്നു

ഇന്നാണൊഴുകുന്നു

പുഴ നീയൊഴുകുമ്പോള്‍

കണ്ണുകള്‍ നീന്തുന്നു

പരലുകള്‍ നീന്തുന്നു

പലതായ് നീന്തുന്നു

പുഴയില്‍ മുങ്ങുമ്പോള്‍

ഉടല്‍ ഞാന്‍ മുങ്ങുന്നു

ഉടല്‍ ഞാനറിയുന്നു

ഉടല്‍ ഞാനലിയുന്നു

പുഴയാണലിയുന്നു

മഴയാണലിയുന്നു

മുകിലാണലിയുന്നു

മലയാണലിയുന്നു

മരമാണലിയുന്നു

പുഴയാണലിയുന്നു

പുഴ ഞാനലിയുന്നു

പുഴ ഞാനറിയുന്നു

പുഴയെന്നറിയുമ്പോള്‍

നിഴല്‍ ഞാനറിയുന്നു

നിഴലെന്നറിയുമ്പോള്‍

നിഴല്‍ ഞാനലിയുന്നു

പുഴയായൊഴുകുന്നു

പുഴയാണൊഴുകുന്നു

പുഴ ഞാന്‍ ഒഴുകുന്നു

പുഴഞാനൊഴുകുന്നു

ആകാശവും തൂവലും

ഒരേതൂവല്‍പറവകള്‍

ഒരുമിച്ചു പറക്കുന്നു എന്നല്ല

ഒരുമിച്ചു പറക്കുന്ന

ചിറകുകള്‍ക്ക്

ഒരേ തൂവലുകള്‍ എന്ന്

ആകാശത്തിലെ പറവകള്‍

വിതയ്ക്കുന്നില്ല എന്നല്ല

വിതയ്ക്കാന്‍ വെച്ച

വിത്തുകളെന്ന്

മഴയത്തു പറക്കുന്ന പറവകള്‍

വെയിലത്തും പറക്കുന്നില്ല

എന്നല്ല

മഴപെയ്തു് പറക്കുന്നു എന്ന്

കൂടൊഴിയുന്ന പറവകള്‍

കൂട്ടിലേക്ക് മടങ്ങുന്നില്ല

എന്നല്ല

കൂടുമായി പറക്കുന്നു എന്ന്

ആകാശത്തിലെ പറവകള്‍

ആകാശത്തിന്റെ പറവകള്‍

എന്നല്ല

ആകാശത്തിന്റെ തൂവലുകള്‍ എന്ന്